"अबकी बोर्ड परीक्षा मा कमाल होइगा ललुआ पास होइगा। दसवां दर्जा तीनि साल मा ललुआ लांघि न पावा नहीं किताबै कांपी पलटिसि कितनौ गा समझावा। तबहू जानै कैसे फर्स्ट पास यहि साल होइगा ललुआ पास होइगा अबकी बोर्ड परीक्षा मा कमाल होइगा ललुआ पास होइगा।। फर्स्ट पास भा फर्स्ट केरि स्पेलिंग बता ना पावै , सुनि मनई बातै अंगुरी दांते तरे दबावैं। ललुआ गांव घरे के समुहे खुदै सवाल होइगा ललुआ पास होइगा अबकी बोर्ड परीक्षा मा कमाल होइगा ललुआ पास होइगा।। सत्य नारायण केरि कथा घरमा तुरतइ करवाइसि, गांव घरे मा लड्डू पेड़ा दुइ दिन तक बंटवाइसि। अइसा लाग कि जैसे ललुआ दीन दयाल होइगा ललुआ पास होइगा अबकी बोर्ड परीक्षा मा कमाल होइगा ललुआ पास होइगा।। हमरौ लरिका घी कि बाती मन्दिर बीच जलावै, वहे भगवान रीजल्ट अगलहेउ साल अइसहै आवै। हमरे लरिका का तुमरे ऊपर विश्वास होइगा ललुआ पास होइगा अबकी बोर्ड परीक्षा मा कमाल होइगा ललुआ पास होइगा।। कौनि व्यवस्था चालू भै हम अब तक समझ न पावा, बिना पढ़े सब पास होइ रहे कौनु जमाना आवा। अइसे इम्तिहान ते केहिका उन्नतभाल होइगा ललुआ पास होइगा अबकी बोर्ड परीक्षा मा कमाल होइगा ललुआ पास होइगा।। ©Vineet Kumar"